ភ្នំពេញ៖ នាយករដ្ឋមន្ត្រីកម្ពុជា សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន អញ្ជើញធ្វើជាអធីបភាពក្នុងពិធីបើកព្រឹត្តិការណ៍ប្រវត្តិសាស្ត្រស៊ីហ្គេម និងអាស៊ានប៉ារ៉ាហ្គេមឆ្នាំ២០២៣ នាយប់ថ្ងៃទី០៥ ខែឧសភា ឆ្នាំ២០២៣នេះ នៅពហុកីឡដ្ឋានជាតិមរតកតេជោ។
នៅក្នុងពហុកីឡដ្ឋានជាតិមរតកតេជោទាំងមូលមានមនុស្សរាប់ម៉ឺននាក់ចូលរួមក្នុងពិធីបើកព្រឹត្តិការណ៍ស៊ីហ្គេម ដោយបង្ហាញអារម្មណ៍រំភើប ត្រេកអរដែលកម្ពុជាធ្វើជាម្ចាស់ផ្ទះរៀបចំព្រឹត្តិការណ៍ដ៏អស្ចារ្យដែលកម្ពុជារង់ចាំអស់រយៈពេល ៦៤ឆ្នាំមកហើយ។
នាយប់ថ្ងៃនេះ មានការសម្តែងនូវសិល្បៈដ៏អស្ចារ្យ ដែលសម្តែងដោយសិល្បករសិល្បការិនី កីឡាករ និងកីឡាការិនីរាប់ពាន់នាក់។
ភ្លើងគប់កីឡាស៊ីហ្គេម នឹងដង្ហែមកកាន់ពហុកីឡដ្ឋានជាតិមរតកតេជោនាបន្តិចទៀតនេះ ដោយមានកីឡាករ កីឡាការិនី ម្ចាស់មេដាយមាសជាច្រើនរូប នឹងទទួលព្រះអគ្គិជ័យកីឡាដង្ហែចូលមកក្នុងបរិវេណទីលានពហុកីឡដ្ឋាន ដើម្បីប្រារព្ធពិធីដុតភ្លើងគប់ធំជាមួយនឹងទស្សនីយភាពកាំជ្រួចដើម្បីអបអរសាទរពិធីបើកការប្រកួតស៊ីហ្គេម។ រួមជាមួយនឹងកម្មវិធីសិល្បៈចម្រៀងជាច្រើនទៀត និងពិធីដង្ហែក្បួនប្រតិភូកីឡាចូលទីលានប្រារព្ធពិធីដ៏អស្ចារ្យ។
ពិធីបើកព្រឹត្តិការណ៍ស៊ីហ្គេមនៅថ្ងៃនេះ នឹងក្លាយជាប្រវត្តិសាស្ត្រដ៏ផូរផង់ ក្រោយខកខាកធ្វើជាម្ចាស់ផ្ទះរៀបចំអស់រយៈពេល ៦៤ឆ្នាំមកហើយ៕
